Чӑваш Енри вӗрентекенсене професси ӑсталӑхӗн конкурсӗнче ҫӗнтернӗшӗн укҫан хавхалантарӗҫ. Педагогсен республика шайӗнчи конкурсӗ ҫакӑн пек номинацисенче иртнӗ: «Чӑваш Енӗн ҫулталӑкри педагог-психологӗ», «Чӑваш Енӗн ҫулталӑкри социаллӑ педагогӗ», «Чи пултаруллӑ класс ертӳҫи», «Чӑваш Енӗн ҫулталӑкри воспитателӗ», «Чӑваш Енӗн ҫулталӑкри учителӗ».
Педагог-психологсенчен конкурсра Шупашкарти 65-мӗш вӑтам шкулти Ксения Яранова ҫӗнтернӗ, социаллӑ педагогсенчен — Ҫӗнӗ Шупашкарти 12-мӗш вӑтам шкулти Светлана Шемякина, класс ертӳҫисенчен — Шупашкарти 1-мӗш гимназири Ксения Коллэ. Вӗсене 50-шер пин тенкӗ тивӗҫӗ.
Воспитательсенчен Ҫӗмӗрлери «Рябинушка» 16-мӗш ача пахчинчи Екатерина Чимрова логопед ҫӗнтернӗ. Ӑна 100 пин тенкӗ парса хавхалантарӗҫ. Учительсенчен Ҫӗнӗ Шупашкарти 12-мӗш вӑтам шкулти Василиса Егорова мала тухнӑ. Ӑна 150 пин тенкӗ тивӗҫӗ.
Чӑваш Енри чи пысӑк хуласенчен пӗри, Ҫӗнӗ Шупашкар каллех ертӳҫӗсӗр тӑрса юлнине Чӑваш халӑх сайчӗ унччен пӗлтернӗччӗ. Аса илтерер: Ҫӗнӗ Шупашкар хулин пуҫлӑхӗ Алексей Ермолаев хулан сити-менеджерӗн Павел Семёновӑн полномочийӗ вӑхӑт ҫитичченех вӗҫленни ҫинчен калакан хушӑва ҫӗртме уйӑхӗн 29-мӗшӗнче алӑ пусса ҫирӗплетнӗччӗ.
Халӗ вара республика ертӳҫи Олег Николаев Ҫӗнӗ Шупашкарӑн сити-менеджерне палӑртмалли конкурс комиссийӗн йышне палӑртнӑ.
Йыша ЧР Элтепер Администрацийӗн Ертӳҫин пӗрремӗш ҫумӗ – Шалти политика управленийӗн пуҫлӑхӗ Николай Каргин, Чӑваш Ен Патшалӑх Канашӗн депутачӗ — Федерацин травматологи, ортопеди тата эндопротезировани центрӗн тӗп врачӗ Николай Николаев, Чӑваш Ен Министрсен Кабинечӗн Председателӗн пӗрремӗш ҫумӗ — финанс министрӗ Михаил Ноздряков, Чӑвашрессовпрофӑн председателӗ Василий Харитонов кӗнӗ.
Чӑваш Енре 65 яш-хӗр Патшалӑхӑн пӗрлехи экзаменӗнче 100 балл пухнӑ. Вӗсенчен улттӑшӗ икӗ экзаменра 200 балл илнӗ.
Пӗр ҫамрӑк аппеляцире хушма 1 балл илнӗ. Аса илтерер, икӗ предметпа 200 балл пухакансем ҫак шкулсенче вӗреннӗ ҫамрӑксем пулнӑ: Шупашкарти 3-мӗш лицей (физика тата математика), Шупашкарти 5-мӗш гимнази (хими тата вырӑс чӗлхи), Шупашкарти 2-мӗш гимнази (вырӑс чӗлхи тата обществознани), Шупашкарти 61-мӗш шкул (вырӑс чӗлхи тата информатика), Ҫӗнӗ Шупашкарти 12-мӗш шкул (вырӑс чӗлхи тата обществознани), Канашри 8-мӗш шкул (истори тата обществознани).
Чӑваш Енӗн Транспорт тата ҫул-йӗр хуҫалӑхӗн министерстви 220-мӗш маршрута хупас мар тесе йышӑннӑ. Асӑннӑ маршрут Шупашкарпа Ҫӗнӗ Шупашкар хулисене ҫыхӑнтарать.
Маларах тӳре-шара асӑннӑ маршрута пӑрахӑҫлас тӗллев тытнӑччӗ. Ҫав шухӑш патне влаҫрисем маршрутсем татах пур тенӗрен пырса ҫитнӗ.
Ҫынсем маршрута хуптарас мар тесе яваплисем патне пӗрре кӑна мар ҫырнӑ. Чӑваш Енӗн Транспорт тата ҫул-йӗр хуҫалӑхӗн министерстви асӑннӑ маршрут валли вӑтам класлӑ автобуссене суйлама конкурс ирттерӗ.
Ҫав вӑхӑтрах ведомство хула тата хула хушшинчи маршрутсене оптимизацилес шухӑша пуҫӗпех пӑрахӑҫламан-ха.
«Транспорт тата ҫул-йӗр хуҫалӑхӗн министерстви ӑслӑлӑхпа тӗпчев ӗҫӗ ирттерсе «Шупашкар — Ҫӗнӗ Шупашкар» маршрут сетьне тишкересшӗн. Ун хыҫҫӑн пӗр-пӗр маршрута хупас е уҫас пирки йышӑну тӑвӑпӑр», – тенӗ транспорт министрӗн тивӗҫӗсене пурнӑҫлакан Юрий Арлашкин.
Ҫӗнӗ Шупашкарта пурӑнакан хӗрарӑма строительствӑра кирлӗ инструментсене вӑрланӑ тесе шухӑшлаҫҫӗ.
Асӑннӑ хулари 10-мӗш пилӗкҫуллӑх урамӗнчи отделочниксен бригади дрель, перфоратор, плита касмалли хатӗр, лазер уровнӗ ҫуккине асӑрханӑ. Кун пирки Чӑваш Енӗн Шалти ӗҫсен министерствинче пӗлтернӗ.
Пурӗ 19 пин тенкӗ тӑракан инструментсем ҫухалнӑ хыҫҫӑн штукатура шанман. 34 ҫулти хӗрарӑм ӗҫе темиҫе кун тухман.
Вӑл йӗрке хуралҫисене ӑнлантарнӑ тӑрӑх, инструментсене илнӗ, вӑхӑтлӑха ломбарда панӑ. Ҫакна вӑл укҫа кирлипе сӑлтавланӑ. Кайран япаласене каялла илесшӗн пулнӑ имӗш. Ломбарда япала парса укҫа вӑл унччен те илкеленӗ иккен.
Хӗрарӑм тӗлӗшпе пуҫиле ӗҫ пуҫарнӑ.
Шкутан вӗренсе тухакансен экзаменсем вӗҫленнӗ. Палӑртма кӑмӑллӑ: тӑватӑ ҫамрӑк икӗ предметпа 100-шер балл пухнӑ.
Ҫак маттур яш-хӗр Шупашкарти 3-мӗш лицейра, 5-мӗш гимназире вӗреннӗ. Ҫӗнӗ Шупашкарти 12-мӗш шкултан вӗренсе тухнӑ ҫамрӑк обществознанипе тата вырӑс чӗлхипе 100-шер балл пухнӑ. Канашри 8-мӗш шкулта ӑс пухнӑ ҫамрӑк та маттур: вӑл обществознанипе тата историпе чи нумай балл пухнӑ.
Сӑмах май, патшалӑхӑн пӗрлехи экзаменӗсен хушма тапхӑрӗ утӑ уйӑхӗн 12-17-мӗшӗсенче иртӗ.
Чӑваш Енри чи пысӑк хуласенчен пӗри, Ҫӗнӗ Шупашкар (Шупашкар хыҫҫӑн калӑпӑшӗпе вӑл иккӗмӗш) каллех ертӳҫӗсӗр тӑрса юлнине «Regnum» информаци агентстви пӗлтернӗ. Ҫӗнӗ Шупашкар хулин пуҫлӑхӗ Алексей Ермолаев хулан сити-менеджерӗн Павел Семёновӑн полномочийӗ вӑхӑт ҫитичченех вӗҫленни ҫинчен калакан хушӑва ҫӗртме уйӑхӗн 29-мӗшӗнче алӑ пусса ҫирӗплетнӗ.
Ӗҫрен кайма ыйтса Павел Семёнов ҫӗртме уйӑхӗн 15-мӗшӗнчех заявлени ҫырнӑ. Ун хыҫҫӑн вӑл икӗ эрнелӗх отпуска кайнӑ. Хула администрацийӗн пуҫлӑхӗн тивӗҫӗсене вӑхӑтлӑх пурнӑҫлама сити-менеджерӑн ҫумне Дмитрий Пулатова шаннӑ.
Канашра 1976 ҫулта ҫуралнӑ Павел Семёнов Ҫӗнӗ Шупашкарӑн администрацийӗн пуҫлӑхӗнче 7 уйӑхран та сахалрах ӗҫленӗ. Вӑл должноҫе ӑна пӗлтӗрхи раштавӑн 2-мӗшӗнче шанса панӑччӗ.
2000 ҫултанпа сити-менеджер должноҫне Ҫӗнӗ Шупашкарта тӑхӑр ҫын йышӑнса пӑхма ӗлкӗрнӗ.
Шалу вӑхӑтра тата туллин тӳленине сӑнаса-йӗркелесе тӑрас енӗпе ӗҫлекен ведомствӑсем хушшинчи республикӑри комисси паян Правительство ҫуртне черетлӗ ларӑва пуҫтарӑннӑ. Унта строительство отраслӗнче шалу вӑрттӑн (тепӗр майлӑ каласан, хыснана налук, тӗрлӗ фонда укҫа куҫармасӑр) тӳлессине пӗтерес ыйтӑва ҫирӗппӗн сӳтсе явнӑ. Ларӑва республика Элтеперӗ Олег Николаев хӑй ертсе пынӑ.
Ведомствӑсем хушшинчи комисси ларӑвне ҫулталӑк пуҫланнӑранпа 552 организацие чӗнсе илсе итленӗ. Хайхисем шалу пӗчӗк тӳленипе «палӑрнӑ». Апла пулсан, вӗсем е чӑннипех те сахал тӳлеҫҫӗ, е шалӑвӑн пӗр пайне вӑрттӑн тыттараҫҫӗ. Ларӑва чӗнсе илнӗ хыҫҫӑн Чӑваш Республикин бюджетне уйрӑм ҫынсен тупӑшӗнчен 3,2 миллион тенкӗ хушма укҫа кӗнӗ, страхлакан взноссем – 7,2 миллион тенкӗ.
Хӑш-пӗр районпа хулара ведомствӑсем хушшинчи комиссисем ӗҫе тивӗҫлӗ шайра пурнӑҫласа пыманни сисӗнет. Начар енчен Хӗрлӗ Чутай, Етӗрне, Красноармейски, Куславкка, Ҫӗмӗрле, Сӗнтӗрвӑрри районӗсене тата Ҫӗмӗрлепе Ҫӗнӗ Шупашкар хулисене асӑнса хӑварнӑ.
Ҫӗнӗ Шупашкарта пӗр хӗрарӑм урамра сак ҫине ларнӑ та ҫавӑнтах вилсе кайнӑ. Кун пирки «Про Город» хаҫата халӑх корреспонденчӗ пӗлтернӗ.
Ҫӗртме уйӑхӗн 27-мӗшӗнче 13 сехет те 27 минутра Терешкова урамӗнчи 9-мӗш ҫурт ҫывӑхӗнче хӗрарӑм сак ҫинчех вилнӗ. Иртен-ҫӳрен пӗлтернӗ тӑрӑх, вӑл 45 ҫулти пек курӑннӑ.
«Вӑл сак ҫинче ларатчӗ, питӗ йывӑррӑн сывлатчӗ, унтан тӳнсе кайрӗ», - пӗлтернӗ ҫынсем. Вырӑна васкавлӑ медпулӑшу ҫитнӗ, анчах вӗсем те нимпе те пулӑшайман – хӗрарӑмӑн чӗри тапма пӑрахнӑ.
Хурлӑхлӑ хыпар: Ҫӗрпӳре 3 ҫулти арҫын ача 5-мӗш хутран ӳкнӑ. Шел те, вӑл вилнӗ. Кун пирки Следстви комитечӗ пӗлтерет.
Маланлӑха пӗлтернӗ тӑрӑх, ҫӗртме уйӑхӗн 23-мӗшӗнче 8 сехет те 40 минутра арҫын ачана килте 5-ри тата 12 ҫулти аппӑшӗсем пӑхнӑ, аслисем пулман. Вӑл тӗпелте чӳрече ҫине хӑпарса кайнӑ та аялалла ӳкнӗ.
Арҫын ачана Шупашкарти пульницӑна илсе ҫитернӗ. Анчах вӑл ҫӗртме уйӑхӗн 24-мӗшӗнче ирхине вилнӗ.
Ҫӗнӗ Шупашкарта та кун пек пӑтӑрмах пулнӑ. 2 ҫулти арҫын ача 4-мӗш хутри чӳречерен тухса ӳкнӗ. Ҫав вӑхӑтра амӑшӗ те килтех пулнӑ. Халӗ ӑна пульницӑра тухтӑрсем май килнӗ таран пулӑшаҫҫӗ.
-4.7 °C